仲有兩分鐘，好彩趕得切香港時間仲係母親節打俾媽子！
喺fb見到呢兩日朋友舖相，全版已被阿仔阿女同阿媽們慶祝母親節啲相洗得一乾二淨，個個笑口噬噬，e起棚牙白到唔洗落漂白水。好欣慰身邊嘅朋友都係愛媽之人孝順仔女，更感恩朋友們都排住隊咁做人阿媽了！
至於恩媽，今年比較特別我屋企玩個人單位逐個單獨同佢慶祝。我都要多謝屋企人除咗佢哋忙又或者怕正日慶祝棧同人迫餐矇也好，總之就騰空了正日俾媽子，因為佢話呢日佢邊度都唔去，要留喺屋企等我電話。
電話通了，「今年你同佢哋點慶祝啊？」「哦，都係咁，你呢？意佬返工如何？你喺嗰邊穩定下來沒有？披索跌度把把聲，有冇大影響？有冇賊？有冇乜有冇襪.....」雖然我知道有屋企人同佢慶祝佢當然開心，但喺電話入面嘅我同佢，我感覺到佢關心我嘅近況，比其他任事情都更緊要。
現今資訊科技發達，打個whatsapp 電話易如反掌。幾年來，遇過好幾次一啲令我心醉倒地嘅事，喺我真係諗唔到香港嘅半夜我可以打俾邊個傾訴嘅時候，我冒著俾老豆炳嘅危險打俾恩媽。半夜兩點，清晨五點，一把沙啞聲音傳來：
「喂，你係咪有咩事？有人恰你？你喺邊？」
「唔好意思，我又嘈醒你....」
「唔緊要噃，幾千蚊一部電話梗係要打吓啦，你照講，我呢埋入廁所關埋門封埋門隙就唔會嘈醒佢哋。」
接個電話好易，但不分晝夜on call 36小時嘅隨時候命，嗰種永遠有人默默守護著，無時無刻都有人應你機嘅感覺，實在暖得無法言喻。
以前一齊住嘅時候總覺得自己老母比人家的囉唆，屋企嘅規矩總比同學的多。相隔廿年或更因為離開了屋企，先知道沒有了囉唆同叮嚀呢種養分，我跟本無法成長去應付今日自己要面對嘅所有問題同困難。好似佢成日蛾我哋出街手袋一定夾喺胳肋底如果唔係俾賊仔搶嘢，要食多啲菜如果唔係會便秘，就算朝早衝返學或返工趕到賴都好，佢必定塞個麵包落個袋度因爲佢知我哋一趕時間就唔食早餐，佢怕我哋養壞唔食早餐習慣。
有囉唆陪伴時，你總覺會嫌煩，
當囉唆不再時，你恨都恨唔返。
人總會老，我家兩老亦不例外。人生短短數十年,剩下可共處的光陰又有幾多？簡簡單單每個周未返娘家食媽煮嘅家常便飯，似乎呢種情境未必再會出現喺我面前。唯有換個方式將每星期見一次濃縮為每年見一星期。我知道兩者距離仍好遠，但我會盡力。
為咗湊大我哋幾隻嘢，你放棄的實在太多。
你話咁大個女都未見過雪，今年我有幸可成為帶你第一次睇雪嘅人。
還想去企鵝島或睇伊瓜蘇大瀑布嗎？
仲有咩想見想做？不妨同我講，我會盡力。
#遙遠的母親節
Search